نام بدرى احسنلك شعر/ سمير الأمير

كل واشرب واتنيل على عينك .. عيش
محنى ومنتوف الريش
اضحك وانت ماليك الخوف
وامشى ع الحبل كأنك من أبطال السيرك القومى
والبس ألف قناع وقناع
علشان ما تبانشى قدام الناس مهزوم
وماتحلمش لأن الحلم حياخد منك رزق عيالك
والناس حيقولوا عليك مجنون
أحسنلك لما الهفة تجيلك
تتفرج على أى مسلسل فى التلفزيون
وتنام بدرى عشان تصحى تروح الشغل
وتمضى ف الدفتر زى عوايدك
إيه؟ مش عاجبك؟
ناوى تقاوح تانى؟
- راح تاكل بالجزمة م الإمبريالية الصغرى( مراتك)
وان جبت اخواتك حتجيبلك امريكا
وحتفتن وتقول إنك ضد الحكم الوطنى وضد التطبيع
وانك حاقد على كل اللى بيشترى ويبيع
وساعتها ماحدش هيصدقك إنك مت ف67
وعبرت ف 6اكتوبر
واتبرعت بنص مرتب علشان مصر ماتبقاش مديونة
اتنيل بقى يا بن المجنونة وعيش زى بقيت الدراويش
وارحمنى عشان الورقه حتخلص
وماعادشى كلام ف دماغى المخرومة.

------------------




كدبنى

كدبنى يا كداب
يا هيصة الزفه
واحكم عليا بالخرس
وف ميتمى اتشفى
الصدق كهل كسيح
على وشه يتكفى
والكدب زى الريح
فى هوجة البحر
بيقلب الدفه
من كام سنه بنلف حوالين الضريح
أحلامنا فى كفه ويأسنا ف كفه
******
كدبنى يا كداب وكدب صوتى
أنا اللى ياما مشيت على دمى
وحفيت على قوتى
ولخبطت غزلى الحياة
فاتشعلقت ف خيوطى.

-------------



شلفطه

أنا شكلى شكلى
بس صوتى مش صوتى
صوتى خليط من الأصوات
مسلم ومصرى وجدودى بدو أو أقباط
حكم الغريب على دمى من يوم وعيت
احتلوا بحرى للصعيد هجيت
واحتلوا الصعيد
فى بحرى بقيت بواب
بيقولوا مصرى وانا مستغرب الموضوع
شحنونى ع الأردن بسبب الجوع
وفى العراق اكتشفت ان انا عربى
فا حاربت ضد الفرس مع أمريكا
لحد ما حصلت حكاية الكويت
قالوا "العراق أهل كفر ومعصية‍‍‍
عايزين يهدوا الحرم ويولعوا ف الزيت
أنا قلت ما بدهاش.. ورجعت على بلدى
مراتى قابلتنى بوش سواد
قالتلى" الباشا صدرله الحكم.. أخد الغيط‍.

----------------



تقدر؟

تقدر تقعد ع القهوة
وتطلب شاى من غير ماتخاف
من نظرة عين الجارسون
ساعة مايحاسبك؟

تقدر تدخل قسم بوليس
وتبلغ عن سرقة بيتك
من غير ما تحس الرعب
بيملى المساحات اللى بتفضى
بين قلبك وقميصك؟

تقدر لما تشوف اليفط اللى ماليه الشارع
بترحب بالموت
وبتزرع جوه الناس الرهبه
تقدر تخطف منهم يافطه
تديها لنسوان الحاره
يعملوا منها "شورتات" لعيالهم
اللى "حاجاتهم" متعريه
تقدر؟ تقدر على تمن الحريه؟

--------------








اشهدى على مشهدى

أنا اللى نايم فى الهدد
ومفيش جاروف عايز يشلنى
وانت اللى لابسه جديد كأن العيد
فجأه اكتشف انك هنا
طب حتى بصى ناحيتى
شوفى الجنازه ناقصها إيه؟

قلبى اللى ملفوف ف الكفن ناقصُه أنا
وأنا اللى مرمى ع الطريق، محتاج عدو
محتاج صديق.. مش مشكله
لكن بجد ..أنا عمرى ما حسيت كده
مجنون أكيد
فى الأربعين الحب أشبه بالمرض
العمر ضاع قومى افرحى
وسيبينى نايم فى الهدد
باينى حافضل مطرحى مليون سنه
من غير جاروف يرمينى فوق كوم البشر
بس المؤكد إن انا ..حافضل أحبك من مكانى
كإنى تمثال الألم
كإنى نقش الريح على حسم الهرم
بس اللى مش هاقدر عليه
إحساس غبى..
إنك سعيده وانا باموت

------------




المدينه اللى كانت بتحمى المدن
كتبت هذه القصيدة ابان العدوان الأمريكى على ليبيا
ولسنوات كنت ألقيها فى المؤتمرات دون أن أشعر أن شيئاً ما تغير
ترى إلى متى سأظل ألقيها؟؟


أنا قتيل الظروف الجبانه
مولود فى كامب الاحتلال
راضع حليب الخيانه
ربانى رأس المال
على الزعيق والجدال
فاحسبتها بصوتى
أو قول بطولة اللسان

صوت القنابل فى ليبيا
بيبعلى باكو لبان وبيشترى سكوتى
بيبعلى فرح الشماته
وبيسرق الأحزان

بالدور يا مدن العرب
دور للرغيف والسلامه
-إحنى هامات النخيل
دور للنزيف والمجازر
- لمى ملامح القتيل
إن كان قتيل الظروف
زيىّ وزى الصحاب
إرميه طعام للكلاب
فى السر دارى الفضايح
لأنه عاش بالحساب
فمات قبيح الملامح.
وان كان قتيل الوطن
ردى نداه فى العَلن
واصرخى بصوته
لأن ضعف المدينه
اللى كانت تحمى جميع المدن
كان سبب موته.

----------



لما يموت الصوت جواك

لما يموت الصوت جواك
تخرس كل حواسك ،تفقد ذاتك
تبحث عن أنفاسك التايهة ف طرقات الصمت
وأحزان الماضى اللى بتلعن كل خطاك
اللى بتموت نبت المستقبل وتقفل كل الأبواب قدامك
لما يموت الصوت جواك
كيف تنده ياصديق أصحابك؟
كيف تحيىّ البسمة المشنوقه بحبال الخوف؟
لما يموت الصوت جواك حتخاف من ضللك
وأكيد حتقدم لحمك قربان لعدوك
ولذلك حين تحزن فجر أنهار الحزن
حين تضحك خللى الضحكه تهز العالم وتهزك
وتهز حيطان الصمت المتسلحه ف كيعانك
لو تغلى أوعى تبرد غليانك
لو فاضت أنهارك علىّ فيضانك
إحسم كل امورك أول باول
واتذكر إن الحرب الدايرة ف راسك
فيها خلاصك.

-------------


ما تفك حزنك بقى

ساعات باحس ان الكلام اللى ف عنيك
عكس أحزانك
وعكس الإشارات اللى بتولع
وبتطفى من غير ما تعرف ليه
مش مشكله إنك بتمشى منتشى
والرصيف تحتك مفلق!
الكارثه إنك بتحسدنى على إحساسى بيك/
بالعيل المدبوح عياط!
مع إنى شايف صورتك المقلوبة بتعدل نفسها وتبان
وكأنك انت امتداد الحزن والحيره
استنى لحظه لما ارسمك على وشى
والبد شويه ف كدبك اللى مصدق الخيبه..

العسكرى المجنون قسمنى
بقاله مليون سنه عمال بيجرى
وفجأه نط جوه عنيك
آه يا حلاوة عنيك
كأنهم متفصلين على مقاس العسكرى
يا هلترى حينفدوه على فين؟

إياك تقول إن العساكر دموع
وان البياده صوت إيقاع
أنا جتتى نحّست وكفايه إنى لسه مستنيك
بنيه صافيه كأنك جاى مش رايح.
ما تفك حزنك بقى وتبطل هوايتك البايخة
اللى حبساك فى ادعاء الفرح
عيط مع الواد الصغير كأنه هوه أبوك
عيط كمان واغسل عنيك
خد المرايه وبص فى شكلك
ثم استعد تكون عكس اللى باين
بالظبط زى ما كنت من مليون سنه
قبل اختراع النضارات والأحزمة
قبل البياده المجرمة
ماتترسم فوق العلم.

-------------




منديل الغريب

تانى يا عمّتى
بتشمى ريحة عشقك الشارد فى منديل الغريب
كان ياما كان
كان فيه شجر وغيطان وحدوته وسهر
وعيال تشت البلح وهيه بتلاعب النخل استغمايه
كان ياما كان
طب عيطى ان كان لابد من العياط
واكشفى راسك واخبطيها فى الحيطان
مش قالك الولد الصغّير
اننا ف عصر الكمبيوتر والمناديل الورق؟
مش قلتلك لملمى دموعك من تحت بيادات العساكر وابلعيها
يا عمتى ما عادش حد بيفتكر
الفديو جيم نسى العيال أساميهاِ
والنهر متعبى ف قزايز البيبسى
والعشق حتى العشق متشفر!
ما عادتش تنفع رعشتك لا غنوه ولا عدودة
كل السكك متقفله وخطوتك محدوده
وام الشهيد محسوده لو افتكرها المسلسل!

بحر الهوا مرشوق سفن متحالفه
أمريكا حالفه ونسل العرب متحدد
الجاز يطولك وانتى ف حضن السنابل
شط العرب ما كتبشى ولا كلمه ف جواب ابنك
ما قالش إنه أسير ولا استشهد

ما تدوريش على معنى الحزن غير فى الحلم
كل اللى ضاعوا مفقودين ِفى الحرب
زى اللى ماتوا ع السريرفى السِلم.
ِِ

ثلاث قصايد وست واحدة شعر/ سمير الأمير
1-
يا شهوة بتشل قلبى
وتجمد الدم ف عروقى
انا حقطعك من لحمى
واعلنها واضحه وصريحه
كنتى انتصار الوهم
على مشاعرى الجريحه
و أنا الوحيد اللى كان بجد.. بيحبنى

*********
2-
من بعد ما خسرتى الرهان
لسه ناويه ترمحى تانى
يا هلترى مين اللى فينا لسه هيعانى
انت اللىبتغيرى فى كل يوم فستان
والا العشيق اللىغاوى المستخبى يبان
******
3-
انا أى نعم مكبوت
وبتكعبل فى صوت خطوتى
لكنى لسه بامتلك
شرف التوحد بالكتب والشعر
ولسه قادر اغادر
كل الوجوه اللى بتشدنى للموت
قادر افوت من بين سيوف الذكريات
واطلع سليم
من وحدتى
واطير على جناح الكلام
شاعر عظيم.

الفيلسوف شعر/ سمير الأمير

راكب حصان من ورق
يا فيلسوف القرايه والأدب
تحسب شطارتك بالتعب
لما تعد العمر بعقاب السجاير
أول ما تطلع شمسك تخبى عينيك وتتاوب
يبدأ عدوك نوبة الصحيان
وانت يا خايب تبتدى ف النوم
من كام سنه والحال على حاله
هذا الفتى ضايع
بين الهرم والجامع
مخزن ألات تعذيب
على وشه كل غريب سايب علامه
من كل صنف يقول "ده بتاعى"
واحد من اتباعى و أمارتى فيه
_ لما ابص ف عنيه يخاف منى
وأمارتى فيه سهران عاملّى حساب.

هذا الفتى غلبان ياخلق الله
لا فيلسوف ولا حتى يعرف كتابه
وأمارتى فيه:-
نظرة عينيه كدابه وبيخلط الأسباب
لِموا الأطبه م الشمال لليمين وقولولى
مين يقدر يشخص حاله؟
ميت بقاله سنين وعمره لسه ف الأول
قالوا الأطبه:- الجمل بتهده أحماله
وابن الأمير لو يفتقر لابد يتسول

كل الكلام ده والجدع نايم
يركب خيول الكلام والوهم ويسافر
يخطب فى قلب" الكرملين" خطبة الجمعه
وف مكه يغسل عينيه بدموعه على "باب النبى"
ويصلى كل اللى فاته- الفرض والسُنه
يطلع بقدرة قادر م النار على الجنه.

إحنا مش بقر البرارى

( رسالة إلى الكاوبوى الأمريكى)

يعنى إيه من غير عصايه
وانت بس تشيل سلاح؟
إحنا فى خندق صفيح
وانت ترمح فى البراح؟

إيه يا صوت الموت؟
يا قابيل الشر.. إيه؟
بحر طافح دم فى فلسطين
وعطشان دم ليه؟

مال عنيك زى الحُفر؟
مال إيديك؟
كابش على رقاب البشر ومش كافيك؟
كل حزن الدنيا من ريحة دمارك
شِد حيلك وانتشى بالقوة وادخل فى انتحارك
لف حبل غرورك المفتول عليك
بشرايين الضحايا
كل ما تكبر.. تِقل
كل ما تعلا.. تِزل
كل مجرم له نهايه
شدحيلك واتخنق بالحقد والحسره وباللعنات
بالدعا الطالع غضب من بطون الأمهات
يا سليل المجرمين وأشباه القرود
يا ابن طرش البحر فوق جُزر الهنود
خش جُحرك
إحنا مش بقر البرارى
كل أساطيلك حاتغرق فى الهجوم الإنتحارى

ردح شعبى من تراث القهر

أنا باعتذر للشعر قبل ما اقول
اللى حقوله مش من فنون القول
ده ردح شعبى من تراث القهر
من كتر غلب الفقير وطول سنين الفقر
ومن صنايع زمن احنا اللى أزمناه
لما اتذعرنا قصرنا فطولناه
ومن اعتياد الظلم يوماتى
لما بقينا قرود والظلم قراداتى
اسمع بقى وصلى ع اللى يشفع فيك:_

خيبتك تقيله بس عامل ديك
ف وسط عيله كلها نسوان
وشلت شيله حتماً ماهياش ليك
نيّلتها بنيله دخنتها بدخان
وكل مرة تشد تعسيله
لما النفير يزعق ف وسط الميدان
متنطط؟ طب قولى بتعمل إيه؟
وأسد عليّا وفى الحروب أرنب
فرق "ابن زين" م "الحصين"
مش حرف بس يابيه
شتان ما بين الكلب والتعلب
والله ما عرف حتى شتان ليه؟
إذا كانوا أصلاً جميعاً كلهم مقلب
مقلب زباله استحاله يبقى فيه ورده
"صاحبك" صدمنى كنت فاكره زعيم
فجأه أختفى وساب الغنم شارده
صنف العساكر صنف واطى لئيم
وبياعين أوطان وبياعين خُرده
كل انتصارهم ف الأساس تسليم
و"أم المعارك" واختها ف البيان
المكرفون أفيون والشعب كييفه
من كتر حزنه أدمن الأحزان
لزق الجرب ع الروح وتفيد بإيه الليفه؟
تاه البشر ف البقر و الرُز ف البرسيم
عيال بتحكى ف حاجات عمرها ما شافتها
وعيال ناقصها علام وبتفتى ف التعليم
وعيال ف تانيه ابتدائىبترسم سياستها؟؟


--------------------------



يامحنى إيدنا بالدم

يا محنى إيدنا بالدم
يا مكربسنا ف نفق الليل
مين يقدر ع الغوله يا عم
والشطار رابطين الخيل
احسب فرق الكيف والكم
واضرب فوق الراس والديل
واوعى تكون أهبل تتخم
ديل القهر مركب ديل
كل ماتيجى الناس تتلم
بعد ماتزهق حط وشيل
بعد ماتشبع غلب وغم
يطلع واحد دمه تقيل
يعمل أب ويعمل عم
شرع شيطانى بالتأويل
جوز الخاله وجوز الأم
بلع الدلتا وشفط النيل .
***********
يامحنى إيدنا بالتار
سلحنا بالنور والنار
واطلقنا من سجن الخوف
وادى الفُقرا خيول وسيوف
واوعى تعد، الفقرا كتار.

حسرة قلبك يوم ماتشوف
كل الكدب صبح مكشوف
بالمقلوب على ضهر حمار
تطلع صورتك فى الأخبار
ترجع خالتى وامى اخوات
مصر تعيش فى تبات ونبات
وتفتح تانى الأزهار

يامحنى ايدنا بالحنه
ابنيلنا وعلى ف الجنه
وادى الغوله بيت ف النار
جنب العسكر والتجار.

----------------




فكره

أنا جاتلى فكرة انى اخترع قنبله
تثير العواطف والتعاطف والشجن
يمكن اقدر ياحبيبتى انى ابوسك ف الميدان
تحت ساتر م الحنان
بس يلزمنى كمان لما تلحقنا العساكر
انى اغطى انسحابك وانسحابى.
ياه......يا خرابى!
كل ده علشان ابوسك!
امال ايه يلزم بقى لو جنونى زاد شويه
ومس عصب العشق فيَا
وغصب عنى لقيتنى عايز احضنك؟

---------------------





صوره

الناس ع القهوه عنيهم على رجلين اللعيبه
وقلوبهم بتلف مع الكوره
الا الواد محمود
قاعد بره القهوه لوحده
لكن كل مشاعره بتزحف ناحية حارة"أحمد حجى"
مستنى عزيزه أم الوش القمر
اللى مخلينى انا شخصياً اتحسر على عمرى
تطلع تدلع وتحط القله ف الشباك
وساعتها قلب الواد محمود هينط ويجرى هناك
يتشعبط ع الحيطه ويصرخ" ياعزيزه انا عطشان اسقينى"
وانا طبعاً يسعدنى ويكفينى
ان عزيزه تحس بحب الواد محمود
علشان يطمن قلبى ويتأكد ان الدنيا لسه بخير
وان إله الكون حى وموجود.

________________



ما تعلقوش حلمكم بيّا

أنا بين بنين
بحرين من ضلام وندعتين من ضى
على مشارف سكتى طوابير من الحزنانين
والمغلوبين على أمرهم
مادين إيديهم يمّتى وكأنى المسيح الحى
ما يعرفوش إن انا خشب الصليب؟
ما يعرفوش إن انا برئ من دم النبى
ومش برئ؟
برئ كمان من كلمتى وجبان؟
ملعون بذنبى وذنب المخدوعين فيّا
إنسان بسيط وشيطان,
مجنون وباتقلب مابين صباعين
فى إيدين زمن مقلوب على نفسه
ومش مضمون.. خفيف
كما رملا يه ف الصحرا
محكومه بالريح القوى وبالريح الضعيف؟
يأيها المساكين
حلونى من ذنبكم
ما تعلقوش حلمكم بيّا
أنا سكه مقفوله لا رايحه ولا جايه
يأيها المساكين
كونوا انفجار الغضب
كونوا انتفاض الحياه والطين
وما تكونوش مساكين.

--------



أهمية العيشة بقلب جامد!

ممكن جداً إنك تنتحر لو زهقت من حياتك
لكن افرض إنك بعد ما مت حسيت إنك برضه لسه تعبان
ساعتها هتعوز ترجع تانى للحياه عشان تحسبها من جديد
وحتحاول أكيد إنك تقابل حد م الملايكه المسؤولين
وبعد ما تتمرمط روحك وتطلع عنيك
ممكن جداً ملاك منهم يقابلك علشان يمسخرك ،ويقولك إنك بتستهبل،
ومش عارف إنت فين وبتكلم مين؟
فى الحاله دى حتعقل وتتراجع عن طلبك المستحيل ،وتطلب حاجه معقوله
زى مثلاً إنهم يعملولك ندب لمدة يومين ف الجنه ،تحس فيهم إنك بنى آدم من لحم ودم
ومن حقك تاكل وتشرب وتنام وتتفسح ،من غير ما تسأل ده بكام وده بكام؟
حا ياخدوا طبعاً بياناتك ويقولولك "انتظر بره لغاية ما نفحص حالتك"
وبعد ما تنشف م البرد وم الحر ويعدى عليك على الأقل يجى كده قيمة سبع تلاف سنه،
حيبلّغوك إن طلبك مرفوض،
والسبب طبعاً البلاوى المسّيحه اللى إنت عملتها ف الدنيا
زى مثلاً.. علبة الملبن إللى انت اشترها لمامتك فى عيد الأم
وبعدين اتسحبت وخدتها وقفلت على نفسك جوه الدولاب،
وكلتها حته حته ومكا فكش ده كمان، فقعدت تلحس السكر اللي ف الورق.
ولا العيش اللى أخدته م الفرن لما كنت طالب ف "الزقازيق"
وخلّصت القرشين اللى بعتهم أبوك ع السنيما والسجاير، يومها ضحكت على صاحب الفرن
وبعد ما أخدت العيش، أخدت كمان بقيت الجنيه اللى انت أصلاً ما دفعتوش
ده غير بقى البنت اللى انت بوستها تحت السلم، بعد ما حلفتلها بكل أيمانات المسلمين
إنك ناوى تجوزها بمجرد ما تنجح فى أولى ثانوى..
يعنى كل فضايحك حتلاقيها قدامك بالتفصيل المخزى الممل.
ساعتها حا تتأكد إن فيه مواضع حركه واتصال بين الدنيا والأخره
وان الشبكه العنكبوتيه والإنترنت اللى هناك متصله مباشرة
بالشبكه العنكبوتيه والإنترنت اللى هنا
وحا تعرف بقى سيادتك إن الانتحار مش حل خالص
وإن الخايب والغلبان فى الدنيا، أكيد حا يكون خايب وغلبان ف الآخرة
وان ما فيش حل غير انك تلغى فكرة الانتحار م الأصل،
وتبتدى تعيش بجد ،وبقلب جامد، وبمنتهى العنف
لغاية ما تموت موتة ربنا وانت صاحى أو وانت نايم
ويا سعدك يا هناك
لو السر الإلهى طلع منك وانت صالب عودك وواقف على رجليك.

الدم ميّه

شعر/ سمير الأمير
( إلى فتاة المحمودية التى اغتصبها جندى أمريكى وقتلها هى وكل أسرتها)
الدم ميه والهوا مخنوق
فى المحموديه البنت مغصوبه
تشكى العروبه لكدابين السوق
اللى سابوها وراحوا يتغدوا
شديت عقالك يابو الدماغ طوبه
دلدلت ديلك والأمريكان شدوا
على بنت عمك ف العراق يا جبان
والدم ميه وانت دمك جاز
سوى كنت مصرى ولا طرش حجاز
أو سورى تتقصع وتمضغ لبان
أو ليبى بتقعمز مع النسوان
وسعلى صدرك كده
لا مؤاخذه يا أخينا
بنت العراق كشفت مخازينا
من المحيط للخليج سوقنا الطناش ع الهبل
هيه خطيّه واحنا فيران الجبل
وكل فسل و(...)عامل أمير فينا
يقعد على البرميل ويعد دولاراته
ويرضى بوش وشارون لوحكمت على مراته
بنت العراق ماتت علشان أصول الشرف
واحنا اللى (جتنا قرف) عشنا بظروف التجاره
ورفعنا راية الدعاره با سم الكلام الشديد:_
تحيا العروبه تحت السلالم وع الرفوف
تحيا العروبه ع الجدار جوه الكهوف
تحيا العروبه ف (الطُرب)
وعلى الجمال زى الجرب
تحيا العروبه بس من غير العراق
تحيا العروبه بالأدب
تحيا العروبه ويموت العرب
وتموت فتاة المحموديه
علشان نصدر نفط ونصفى القضيه
والدم ميّه.. الدم ميّه.. الدم ميّه